ព្រឹកថ្ងៃទី២៩ ខែធ្នូ ឆ្នាំ២០២៤ ក្រសួងការពារជាតិកម្ពុជាបានប្រារព្ធពិធីអបអរសាទរខួបលើកទី ២៦ ឆ្នាំ (២៩ ធ្នូ ១៩៩៨ – ២៩ ធ្នូ ២០២៤) នៃ “ទិវាសន្តិភាពនៅកម្ពុជា” នៅវិមានឈ្នះឈ្នះ ក្រោមអធិបតីភាពលោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ។ លោក ទៀ សីហា បានលើកឡើងថា ការរៀបចំ “ទិវាសន្តិភាពនៅកម្ពុជា”ឆ្នាំ២០២៤ ជាការដាស់តឿនក្រើនរម្លឹកដល់ប្រជាជនកម្ពុជាគ្រប់ជំនាន់ ទាំងក្នុងពេលបច្ចុប្បន្ន និងពេលអនាគត ឱ្យចងចាំជានិច្ចអំពីមហាវិនាសកម្មរបស់ជាតិ និងទុក្ខសោកលំបាកវេទនារបស់ប្រជាជនកម្ពុជា ព្រមទាំង ផលវិបាកនានាដែលបង្កឡើងដោយសង្គ្រាមនិងការបែកបាក់ជាតិ ព្រមទាំងការបំផុសស្មារតីដល់ប្រជាជនកម្ពុជាគ្រប់ជំនាន់ឱ្យស្អប់ខ្ពើមសង្គ្រាម។ ជាពិសេសក៏ជាការបំផុសស្មារតីដល់ប្រជាជនកម្ពុជាគ្រប់ជំនាន់ ឱ្យយល់ដឹងច្បាស់អំពីគុណតម្លៃនៃសុខសន្តិភាព ហើយរួមគ្នាលើកកម្ពស់វប្បធម៌សន្តិភាព នៅកម្ពុជា ការចូលរួមការពារនិងថែរក្សាឱ្យបានដាច់ខាតនូវសុខសន្តិភាព ដែលជាអាយុជីវិតរបស់ជាតិ និងជាគ្រឹះដ៏មានតម្លៃបំផុតសម្រាប់ការអភិវឌ្ឍប្រទេសជាតិ និងភាពសុខសាន្តរបស់ប្រជាជនកម្ពុជាប្រកបដោយចីរភាព។ នៅថ្ងៃទី២៩ ខែធ្នូនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក៏បានចេញសារអបអរសាទរទិវាសន្តិភាពនៅកម្ពុជា ដោយសម្តេចបានគូសបញ្ជាក់ថា ២៦ ឆ្នាំដែលកម្ពុជាទទួលបានសន្តិភាព គឺមិនមែនងាយស្រួលនោះឡើយ ដូច្នេះយើងត្រូវដឹងគុណស្ថាបនិកមគ្គុទ្ទេសក៍ឯក និងប្រតិបត្តិករនយោបាយឈ្នះឈ្នះ។ […]